“Nas escavacións realizadas no 2008 descubriron ata 3 muros perimetrais, que facían inexpugnable á edificación, con capacidade para resistir durante meses grazas ó alxibe de auga”, informou Estefanía Purriños. Sábese que no século XI xa estaba en construción. Puido pertencer aos PIñeiro,  arrebatado no 1364 por Pedro I a favor de Fernán Pérez de Andrade, o Boo. Unha década mais tarde o rei Henrique II de Trastámara confírmalle a propiedade, disque polo apoio a este rei xa que Fernán Pérez parece ter participado no asasinato de Pedro I, explicou a especialista en Turismo. 

O castelo sufriu as dúas revoltas irmandiñas, no 1431 e no 1466 ó 1469. Trala derrota dos Irmandiños, eses foron castigados a traballar na súa reconstrución. Co tempo e cos casamentos o castelo pasa a mans dos Alba, que é a propietaria actualmente. O castelo estivo abandonado dende principios do século XVII, e as súas pedras foron empregadas para a construción das casas da contorna, así como a presa e a central hidroeléctrica.