“Todo xacemento arqueolóxico é unha caixa de sorpresas”, relata o Juan Luis Montero Fenollós, director da Cátedra de Arqueoloxía e Educación Patrimonial da Universidade da Coruña e o Concello de Ferrol, e profesor da Facultade de Humanidades e Documentación do Campus Industrial. Destacou a “monumentalidade deste enclave castrexo”, moi ben preservado, grazas a que na zona non houbo actividade humana. “O peor inimigo do patrimonio é a actividade humana que produce destrución, intencionada ou non”, explica o codirector da escavación que se atopa aínda nunha fase inicial. “Son dúas hectáreas, queda moito por facer e o xacemento vai pedindo o seu ritmo”. Unha vez rematada a campaña no castro, comezará o traballo menos visible pero fundamental de estudar todo o atopado. 

Visitas ao Castro 

“Ás veces temos idea que o urbanismo veu con Roma, pero aquí vemos unha planificación do espazo dunha comunidade que decide ocupar un territorio, o chamativo é ver como se planifica, como se vive”. Quen queira saber máis pode participar nas visitas guiadas gratuítas previstas para o xoves 30 e o venres 31 de xullo. O punto de encontro será o local da Asociación de Veciños Val de Esmelle.