Ademais de saborear as creacións culinarias, a clientela dos establecementos participantes no certame optaba a premios moi apetecibles que entregaron esta mañá o alcalde, Juventino Trigo; a concelleira de Promoción Económica e Turismo, Ángeles Coira, e outros membros da Corporación. Unha viaxe para dúas persoas, cortesía de Estrella Galicia; unha limpeza da tapicería dun turismo, cortesía de Ecolimpauto; e diversos obsequios patrocinados por Electroagro Fene, Bodegas Barral, Escola Bellón-Maceiras e a Imprenta San Esteban foron os agasallos. 

O Concurso de Tapas de Fene está moi consolidado. En só dúas fins de semana a clientela entregou 3.348 tarxetas. Ademais, 187 persoas conseguiron completar o percorrido, probando as nove tapas a concurso. Cos seus votos, determinaron que o premio á Tapa Popular Tradicional fose para os “Crepes de Peixe e Marisco” da Cafetería Bombay, co “Montadiño ao Tío Pepe” do CCDR de Perlío como subcampioa da categoría. En canto á Tapa Popular Creativa, impúxose o “Tartar de Langostinos” da Cafetería Pachamama, coa proposta “Ruliña!” da Cafetería Lembranza no segundo posto. Pola súa parte, o xurado profesional coincidiu en outorgar o primeiro premio da categoría Tapa Creativa ao “Tartar de Langostinos” da Cafetería Pachamama, coa “Delicia Cubana “ do Galicuba no segundo posto. En canto á Tapa Tradicional, o xurado escolleu como campioa a proposta “O Sol da Cociña” do establecemento “O Son da Cociña”, que hoxe puido estar presente no acto, e como subcampioa os “Crepes de Peixe e Marisco” da Cafetería Bombay.