Glass City non é unha obra histórica, pero os acontecementos ocorridos no pasado inciden nela con especial consideración. Deste xeito, Eduardo Alonso volve amosar o seu gusto pola historia, como xa fixera en Imperial: Café cantante. Vigo 1936.

A música unha vez máis corre a cargo de Bernardo Martínez. En canto ao elenco de Glass City, atopamos nomes coñecidos do panorama artístico galego como Luma Gómez no papel de Carme Polo, viúva de Franco; Xavier Estévez, na pel do comandante Emilio Camardiel; Monti Castiñeiras como o tenente coronel Rafael Rioboo; Carlos Mosquera "Mos" que interpreta o comandante Carlos Estrada ou Maxo Barjas como Beatriz Rivero de Castro.

“Un espectáculo divertido, que non deixara indiferente a ninguén”, segundo afirmou o propio Alonso. A estrea terá lugar mañá xoves ás oito e media da tarde no Teatro Jofre de Ferrol, onde repetirán o venres e o sábado.

De feito, ata finais de ano teñen pechado un calendario de actuacións que a levarán por vilas de todo o país como Monforte de Lemos, Compostela, Burela, A Coruña, Carballo, Oleiros, Ourense, Ribadeo, Tui, Cangas, Vilagarcía de Arousa, Narón, Pontevedra, Vigo, Valdeorras e Ames. Ademais, Teatro do Noroeste ten previsto preparar a versión en castelán para o resto da península se teñen suficientes ofrecementos de teatros de fóra.