Os 9 espectáculos galardoados nos María Casares son:

1. Unha inimiga do pobo, de Talía Teatro (7 Premios): espectáculo, dirección, actriz protagonista, actor secundario, adaptación-tradución, espazo escénico e iluminación
2. O Auto do Castromil, de Producións Teatrais Excéntricas en coprodución co CDG (2 premios): Dirección e vestiario
3. Deadpan Karaoke, de Ibuprofeno Teatro (2 premios): espazo sonoro e maquillaxe
4. Nanai da China, de Pérez&Fernández (1 Premio): espectáculo de monicreques, obxectos e figuras animadas
5. Crisálida, de Caramuxo Teatro (1 premio): espectáculo infantil.
6. Shakespeare en Roma, do CDG(1 premio): actor protagonista
7. Entrega en man, de Contraproducións(1 premio):actriz secundaria
8. Un hotel de primeira sobre o río, do CDG (1 premio): dirección de movemento
9. Códice K, de Ainé (1 premio): texto orixinal

O escenario do Teatro Rosalía converteuse nun barco pirata que celebrou as nosas artes escénicas nunha noite na que Vero Rilo leu o Manifesto Galego no Día Mundial do Teatro e María Barcala recolleu o Premio de Honra Marisa Soto. A gala, que foi retransmitida por Youtube a través da canle dos Premios María Casares, contou co discurso de Arantza Villar, presidenta da Asociación de Actores e Actrices de Galicia. Na súa intervención, Villar realizou un percorrido por diferentes cifras que definen a situación laboral da profesión artística. Neste sentido, tirou man do informe socioeconómico da AISGE para lembrar que o “77% da profesión da interpretación de todo o estado ingresa menos de 12000 euros anuais polo seu oficio” e que os ingresos dos actores masculinos supera nun “40% o das actrices”, subliñando así a persistencia da brecha de xénero. “Dende aquí, dende os escenarios, podemos pelexar contra a precariedade. Cómpre facelo dende o colectivo”, sinalou a presidenta da AAAG, antes de celebrar que o sector escénico e o audiovisual contan cun “tecido asociativo profesional sólido” e que “non hai máis forza que a unión”.

O discurso da Xunta Directiva tamén incluíu mensaxes antibelicistas fronte á invasión en Gaza, mostras de apoio aos traballadores e as traballadoras da dobraxe que están a reclamar o cumprimento do seu convenio colectivo e críticas á CRTVG. “Reclamamos que o ente público sexa verdadeiramente transparente e transversal, alleo á manipulación. Solicitamos que se cumpra a Lei de Medios. Merecemos outra televisión”, rematou Villar.