“Ten como resultado unhas secuelas que afectan á persoa e á súa independencia, é unha das principais causas de morte en España, a principal causa de discapacidade na idade adulta e afecta a moitas persoas menores de 60 anos”, explicou Inés Mosquera. Os servizos sociais de Fene van colaborar coa Federación de Dano Cerebral para facilitar información sobre a entidade e os medios dos que dispón, segundo anunciou Pilar Couce.

“A causa principal do dano cerebral adquirido, ronda o 74%, son os ictus, seguida dos traumatismos cranio encefálicos”, segundo informou Inés Mosquera. A Federación de Dano Cerebral Galicia facilita apoio e recursos para facilitar a vida ás persoas que padecen este problema. Ofrecen axudas técnicas relacionadas coa mobilidade funcional como cadeiras de rodas eléctricas, grúas ou camas articuladas con colchóns antiescaras. Tamén cubertos adaptados ou táboas para a elaboración de alimentos e axudas para vestido e hixiene persoal ou para a comunicación.