O nome foi motivo de debate e reflicte os negocios das dúas profesionais da estética que traballan xuntas pero non revoltas. O seu é un coworking. Dúas empresas que comparten espazo e gastos, pero non ingresos. Por iso, tendo as cousas claras, non ven problema ningún para levar o negocio a medias. As dúas emprendedoras están satisfeitas coa acollida e a resposta do público nestes primeiros meses. As dúas teñen ampla experiencia profesional. “As persoas en Perlío e Fene gustan de estar guapas ”, asegura Noemí. “Eu creo que a media de idade anda polos cincuenta anos, son as persoas que máis se arranxan e máis se preocupan”. Neste novo negocio ofrecen distintos servizos para o coidado persoal. Mesmo a eliminación de tatuaxes, “cada vez é máis frecuente a eliminación de tatuaxes, eu levo catro anos con iso”. Pode ser “porque o tatuador tivo un fallo ou porque xa non gusta”, explica “non é doado borralo, é un proceso lento porque o corpo ten que ir eliminando a tinta”. Tamén venden produtos para mantemento na casa. E adaptan o seu horario de traballo ás necesidades da clientela, porque son conscientes das dificultades laborais e de conciliación que teñen moitas persoas interesadas en manter un bo aspecto.