E a súa capacidade de traballo é tanta que xa teñen listo, e están empezando a presentar, o Volume II de “Pequeno Manual para Grandes Cambios.”, con 13 pezas. Sonoridade, sutileza, melodías acolledoras e a presenza impoñente dunha voz marabillosa que é a de Carla Romalde, “unha cuestión de química pura”.

Zavala xurde do encontro de Víctor Ledo e Carla Romalde, ao proxecto uníronse Carlos Castro “Kos” (programacións, bases e visuais), Ana Lage (baixo, piano, acordeón e coros) e Elena Zas (piano, viola e coros), Carla aporta ao grupo a súa fantástica voz e a frauta traveseira, e Víctor Ledo a guitarra e, sobre todo, a mestría na composición das pezas que presentan. 

Zavala é un proxecto musical coidado, mimado poderiamos dicir. Un luxo de instrumentos poderosos, elegancia electrónica, innovación e tamén tradición, todo isto engarzado a través de voces privilexiadas que acariñan letras comprometidas e rigorosas e é que Zavala son, sobre todo,  “CANCIÓNS con maiúsculas”.