“Unha maneira de meterse no mercado laboral, con formación en áreas de alta empregabilidade, para nós é moi importante”, destacou o concelleiro Manuel Polo sobre o obradoiro Inicia VIII. Dezaseis mozos e mozas comezaron esta semana en Fene a aprendizaxe na fabricación e montaxe de instalacións de tubería industrial. 

Obras

No calendario de obras, en San Valentín “xa se entregou a área recreativa, o importante desa primeira fase era a drenaxe que xa se acreditou e permitirá gañar terreo para a veciñanza”.  Está en marcha a reurbanización da rúa Antonia Montero, agardando neste momento a que a compañía eléctrica faga a soterración da liña. Naturgy tamén está facendo obras, soterrando liñas, na zona de Perlío, o que permitirá eliminar un poste entre as vivendas de Astano e Aguilar. O Concello, traballa, ademais, no segundo tramo de entubado das cunetas no Campanario e segue en marcha a actuación en Castro e Beiramar, co cambio de servizos de auga e saneamento e inclúe o aglomerado na zona do campo dos Pinares.

Presupostos

“Optimizar o máis posible e facer un plan de obras que atenda necesidades importantes”. Son propósitos cos que o Goberno local está a traballar nos Orzamentos do Concello de Fene para o ano que vén, destacou Manuel Polo. Do proxecto de Presupostos da Xunta, criticou que “son Orzamentos máis propagandístico que outra cousa, a maioría de investimento é gasto fixo, manter o que hai e as veces nin sequera, como as pingueiras do IES de Fene”, sinala o concelleiro. “Faltan ideas e hai un problema moi grave de financiación”, conclúe.