Os traballos arqueolóxicos que se están a desenvolver na foxa común do cemiterio de Serantes permitiron localizar os primeiros tres corpos con “evidentes signos de violencia extrema” e “posicionados de maneira irregular”. Os primeiros traballos no cemiterio ferrolán confirman a existencia de restos superpostos nunha foxa estreita e sen alterar. A cata de comprobación permitiu localizar as tres primeiras persoas, atopáronse extremidades superiores superpostas e verificouse que a foxa continúa a máis de un metro e medio de profundidade. 

O decano da Facultade de Xeografía e Historia, Antonio Míguez, sinalou que as investigacións confirman a magnitude dos crimes cometidos neste enclave: “Hoxe estamos case seguros de que son arredor de 200 persoas asasinadas aquí, e iso dinos que estamos nun lugar no cal se produciu unha masacre e que as persoas que o fixeron non enterraron dunha maneira normal, senón algo máis parecido a ocultalas”.

Nos vindeiros días comezarán os estudos antropolóxicos e xenéticos para identificar ás vítimas.  A iniciativa, impulsada pola Deputación en colaboración co grupo HISTAGRA da Universidade de Santigo de Compostela está financiada polo Goberno. Ten como principal obxectivo a exhumación, identificación e devolución dos corpos alí enterrados ás súas familias.