O Museo Casa de la Troya recrea a pensión de estudantes e a vida universitaria de Santiago de finais do século XIX que inmortalizou Alejandro Pérez Lugín na súa novela La Casa de la Troya, cuxa primeira edición –con capa ilustrada por Castelao– data do ano 1915. Nestes tempos de pandemia, coa mobilidade limitada, o museo quere achegarse a toda Galicia a través do ciclo “A Troya en ruta”, en particular ás localidades vencelladas cos personaxes da novela, en colaboración coa Deputación da Coruña. O ciclo arranca este sábado, 27 de marzo, no Casino de Carballo. Ás 19:00 horas proxectarase o documental A Compostela de La Casa de la Troya, centrada no mundo troyano, de media hora de duración, que se estreaba en 2018 coincidindo co 25º aniversario da apertura do museo. A entrada é libre ata completar o aforo.

A través deste ciclo búscase ademais divulgar a figura de persoas que estiveron ligadas á novela e ao seu tempo como Manuel Casás, de A Coruña; Camilo Bargiela, de Tui; Javier Puig, de Pontevedra; Manuel Otero Acevedo, de Pontecesures… E procurarase facer nas localidades vencelladas ás biografías de cada un deles. Despois da proxección do documental no Casino de Carballo manterase un coloquio co público asistente sobre a figura de “Enrique Labarta Pose, estudante en Santiago”, natural de Baio (Zas), que aparece na novela de Lugín como o personaxe de Casimiro Barcala. Presentarao o vicepresidente do Padroado da Casa de la Troya, Juan Carlos Díaz. Intervirán o vicepresidente da Deputación da Coruña, Xosé Regueira; o director de Arraianos Producións, Aser Álvarez; o actor do documental Suso Martínez; e do director do Museo Casa de la Troya, Benigno Amor.

Unha viaxe á vida universitaria de Santiago de finais do século XIX

O documental está dirixido por Aser Álvarez e Benigno Amor, filmado por Nacho Santás e nel actúan Suso Martínez e Jaime Amor. Benigno Amor é o presidente da Asociación de Antiguos Tunos Compostelanos, entidade que xestiona o museo. Explica que “se trata dunha viaxe aos tempos de La Casa de la Troya, a novela de Pérez Lugín. Manolito Casás, personaxe da novela, aparéceselle a un neno na Casa de la Troya e lévao a facer un percorrido polas rúas de Compostela, lembrando os seus anos de universitario”. O relato amósase mesturado con intervencións de persoas como o exalcalde de Santiago, Xerardo Estévez; Darío Villanueva, que fora director da Real Academia Española e reitor da Universidade de Santiago; Encarna Otero, profesora de Historia e exconcelleira de Santiago; José María Fonseca, antigo tuno e presidente de Bodegas Terras Gauda; Anxo Angueira, presidente da Fundación Rosalía de Castro; Suso Couceiro, libreiro; e Waldo Caamaño, antigo estudante en Santiago.

O documental recolle a historia desta casa tan vencellada aos universitarios e á capital galega. Situada en pleno casco histórico da cidade, desde 1886 ata 1906, a Casa de la Troya comezou como hospedaxe de estudantes rexentada por dona Generosa. Nela a loxábase o personaxe principal da novela de Lugín, Gerardo Roquer, e os seus compañeiros de estudos. Abriu como museo en 1993, xestionado pola Asociación de Antiguos Tunos Compostelanos. É unha produción conxunta da Asociación de Antiguos Tunos Compostelanos, o Museo Casa de la Troya e Arraianos Producións. Contou coa colaboración da Xunta de Galicia, a Consellería de Cultura, Cultura da Deputación da Coruña, o Concello de Santiago, a Universidade de Santiago, Bodegas Terras Gauda e Bierzo Enxebre.

(Na imaxe, Suso Martínez, guía turístico e historiador)