“Don Manuel de Pedre era un bo mestre, un dos mellores que houbo aquí, estaba moi preparado e preocupado polo medio ambiente” recordaba en 1997 o veciño de Barallobre xa falecido José González Ardá. Segundo a memoria familiar, don Manuel levábase ben co fundador do PSOE Pablo Iglesias Posse. O histórico dirixente socialista tivo no colo ao fillo do mestre, posiblemente na súa visita a Santiago de setembro de 1896. Pedre naceu en Caión (A Laracha) en 1869. Gañou a praza de mestre en Melide en 1893. Dando escola en Bóveda en Vilar de Barrio (Ourense) viviu un accidente cando caeu o piso da escola, quedando unha nena colgada pola cintura. Impartiu tamén clases en Mazaricos, Carnota e Mañón. En 1928 tomou posesión da praza en Barallobre onde desenvolveu unha intensa actividade social, sendo o presidente do comité pro-monumento ao camiñante descoñecido, iniciativa impulsada por Alfonso Piñón. Foi separado do servizo en xullo de 1936, nunha decisión irregular e ilegal.  Faleceu en Vigo o 12 de xuño de 1940. 

Algúns dos asistentes ao acto no Monumento ao Camiñante Descoñecido. Barallobre. 24 de agosto de 2024.

Fotografía Xan Xe