ACTUALIDADE
-
Novas
Novas sobre programas, emisoras,... Todo o mais actual e de interese nesta sección.
-
Radio á carta
Escoita online os podcasts dos teus programas favoritos de Radiofusion.
Praza Alcalde Ramón Souto s/n, 15500 Fene (A Coruña) Galicia - Tfno. 981 492 773 - noticias@radiofusion.eu
Facebook
Twitter
Un monumento ao pallaso e un Museo do Humor. Son dúas singularidades que o visitante atopa ao achegarse a Fene. Detrás destas iniciativas está a man do humorista Xaquín Marín. O monumento ao pallaso foi realizado polo ceramista Francisco Pérez Porto.
Francisco Pérez Porto naceu en Barallobre en 1938. Iniciouse no mundo da cerámica polo ano 1968. Aprendeu en Buño a técnica do torno para logo darlle unha volta á cerámica tradicional e facela arte, en palabras de Isaac Díaz Pardo, con quen colaborou vinteoito anos en Sargadelos. Alí creou e dirixiu as experiencias internacionais de verán. Pérez Porto, ademais do Monumento ao Pallaso, creou, entre outras obras, o Monumento a Alexandre Bóveda na Coruña, ás Pepitas en Ferrol, a Andrés Barallobre no campo da festa de Barallobre e a fonte das Lavandeiras en Lugo.
Monumento ao Pallaso
Xaquín Marín presidiu a comisión promotora deste monumento creada en 1999. Indicaba daquela que "o oficio de pallaso é un oficio difícil. Debemos contribuír a realzar esta profesión, xa que este colectivo, o dos pallasos, de pequenos nos engaiolou e de maiores nos traen agradábeis recordos". Afirmábase tamén que "os pallasos hai tempo que sofren un deterioro da imaxe importante. Quizais este mundo civilizado do cemento e no que se vive constantemente con presas, non deixe lugar á tenrura. Só así se entende que o nome de pallaso se atribuía a todo aquel que fai algo mal, non elabora o seu traballo con dignidade ou non cumpre co seu deber". A iniciativa quería contribuír a restaurar o bo nome do pallaso. Con carácter previo, a comisión cidadá programou un Dia do Pallaso o 29 de febreiro do 2000 con actividades nos centros escolares e instalacións deportivas de Fene. Participou entre outros, Roberto Vidal Bolaño e milleiros de nenos e nenas. O monumento inaugurouse no Parque Castelao de Fene o 22 de xuño de 2001.
Publica o teu comentario agora