Se nada se torce, pronto desaparecerá un dos esqueletos que deixou en Fene, na avenida Naturais, o estoupido da burbulla.  A empresa Prosema de Ferrol proxecta aproveitalo para construír 15 vivendas, de dous e tres cuartos, garaxe e trasteiros. Manuel Polo explicou que a empresa interesouse por varias posibilidades e ao final decantouse por facerse con esta estrutura, que levaba moitos anos parada. Chegou a supoñer un perigo e foi valada por orde do Concello, que tamén tivo que ordenar no seu día a limpeza da parcela. 

“Unha boa nova”, di o concelleiro de Urbanismo, que lembrou, ademais, a operación coa que o Concello se fará con terreos da antiga Sareb en Fene e Maniños. Apunta que está habendo tamén moito interese na construción de vivenda unifamiliar. “Cónstame que está habendo compras de parcelas para vivenda unifamiliar, por exemplo en Magalofes, é unha boa nova para fixar poboación en todo o concello, non so na zona urbana”, destacou. 

Xunta e Goberno pasivos

A vivenda é unha preocupación da cidadanía que comparte o concelleiro de Urbanismo. Aféalle Manuel Polo á Xunta, que ten as competencias en vivenda, que non mova ficha en Fene, malia terlle posto terreos á disposición o Concello. Tamén lamenta que non actúe na práctica o Goberno central, do que censura a falta de resposta ás demandas da administración municipal, por exemplo no referido á cesión de terreos para o centro de saúde. “Grazas á intervención de Néstor Rego logramos ter unha videoconferencia coa directora de Casa 47, démoslle toda a información e aí morreu o conto, é moi lamentable, pero responder non responde”.