Fene ten unha taxa de criminalidade “moi por debaixo da media”, segundo os datos analizados na Xunta Local de Seguridade celebrada na Casa do Concello. A taxa é de 19 delitos por cada mil habitantes. Unha cifra de delitos moi inferior á media provincial, que se sitúa en 38 delitos por mil. Tamén se falou na xuntanza sobre violencia de xénero, no que tamén hai menos casos en Fene, pero iso non fai baixar a garda ao alcalde. “Sempre que haxa un caso é unha grave preocupación”, destacou o rexedor, que insistiu na necesidade de traballar desde a infancia para previr o machismo. Na Xunta Local de Seguridade tamén  participaron a concelleira de Seguridade, Sandra Permui, e representantes da Garda Civil, de Tráfico, e as policías Local e Autonómica.

Obras 

O Concello de Fene inicia as obras de mellora da rede de pluviais e pavimentos en Buios, unha actuación da que deu detalles o alcalde que visitou a zona antes do comezo dos traballos xunto co concelleiro de Obras, Manuel Polo. As actuacións, financiadas con cargo ao POS+ 2024, foron adxudicadas por 179.740,26 euros. Teñen un prazo de execución de tres meses.