Manseliña
Tin Novio, Pablo Carpintero e María Gimenez forman Manseliña, ,grupo que interpreta a súa música con instrumentos tradicionais.  O primeiro disco “Sedia la fremosa” recollía obra de Martín Codax e do rei Afonso X o Sabio. No traballo “María Pérez se maenfestou” céntrase máis nas cantigas de escarnio a María Balteira,soldadeira galega activa nas cortes de Fernando Terceiro e Afonso Décimo e branco preferido das bromas dos trobeiros. Inspirou polo menos catorce textos poéticos. No século Trece a lingua da poesía en toda a península era o galego. O castelán reservábase para as partidas e documentos de tipo máis administrativo. Ademais da poesía piadosa, Afonso fixo cantigas de escarnio e mal dizer, nas que sorprende a súa capacidade de ironía e de sarcasmo, o espírito burlón, e aínda ás veces obsceno. Vese ben o seu grande enxeño e a gracia no uso da lingua.  Hai cantigas de especial interese, entre elas a de Santa María de Lugo, unha dun romeu a Santiago e a da donosiña ou donicela do rei, que di o propio Afonso que é así como a chaman os galegos.  Alvaro Cunqueiro publicou en 1980 na Editorial Galaxia unha escolma do cancioneiro de Afonso Décimo. Escolleu vintetrés poemas e ofrece a súa versión no galego moderno. En 2021, Galaxia reeditou un facsímile da edición publicada en 1980.