“Servir de punto de encontro entre sociedade, industria e comunidade científica e tamén conservar, protexer e valorizar os obxectos que pola súa importancia histórica son parte do patrimonio ferrolán” son os obxectivos do Museo da Construción Naval. Nas súas instalacións atopamos información sobre a evolución dos estaleiros, da carpintería de ribeira ou restos da fragata Santa María Madalena que afundiu na ría de Viveiro en 1810. Tamén podemos ver unha sala de gálibos, onde se trazaban as liñas a escala natural do buque para despois construír os modelos, así como as ferramentas que se utilizaban ou unha zona adicada ás canles de Experiencias Hidrodinámicas. Navantia ten unha sala propia e Astano outra, con maquetas da grúa Pórtico, o Arteaga e a súa historia. Hai tamén un espazo dedicado aos faros e sinais marítimos, con ópticas de faros como o de Estaca de Bares.