Por que, a pesar da vizosidade dos medios en galego, a última década entre 2010 e 2020 foi letal para a nosa lingua. É unha evidencia que o uso do galego practicamente desapareceu entre a xente nova das cidades. O número de cidadáns que teñen o galego como primeira lingua tamén descendeu de forma alarmante nesta década. Por iso, AMEGA reclama  unha actuación máis decidida de todas as administracións públicas para a potenciación do idioma galego. E tamén reclaman da cidadanía unha maior conciencia, unha maior valoración das características singulares de Galicia. 
En Padrón
Este sábado 20 de marzo a Asociación de Medios en Galego celebrou o Día dos Medios en Galego. Fíxoo co programa “Moito que sachar” en formato Late Night, presentado polo actor mazaricán Federico Pérez Rey. A Casa Museo de Rosalía de Castro en Padrón, converteuse nun estudio de televisión para acoller este Late Night acompañado da música de Iván Barreiro, á guitarra; Carlos Arévalo, á batería; e Ale Casquero aos teclados. Fede abriu o programa cun simpático monólogo no que se atreveu mesmo a reescribir a historia do nacemento de Galicia da man dun Breogán capataz de obras nas pirámides de Exipto de permiso pola nosa terra. 

O primeiro invitado, trala benvida ofrecida polo anfitrión Anxo Angueira, presidente da Fundación Rosalía de Castro, foi Valentín Garcia, Secretario Xeral de Política Lingüística, que ademais de facer referencia á ”concentración parcelaria das lingua” que contaba Fede, recoñeceu que “queda moito por facer nesta lingua, pero temos que gabarnos de que somos a única lingua cooficial no estado español que é maioritaria”. En calquera caso, referendou a necesidade de “afianzala, nesta nova Galicia, hai que colocala nos novos tempos e nos novos medios, e aí os medios en galego teñen moito que dicir”. 

A responsable da área de Normalización e Igualdade da Deputación da Coruña, María Muíño, resumiu brevemente a labor das deputacións para “contribuír a avanzar no escenario da normalización da nosa lingua, en colaboración das administracións locais, e as entidades sociais e culturais: Escoitar, estar atentas e colaborar.” Declarouse seguidora “habitual dos medios en galego, por convicción, porque as linguas están feitas polas persoas, e os relatos son feitos dende aquí”.

Unha das grandes intervencións foi protagonizada pola mesma “Lingua Galega”. Lidia Veiga representou á lingua nai con moita retranca, dando conta da necesidade de sachar, por exemplo, abrindo a posibilidade de emitir en “tiktok” pol@s xornalist@s galeg@s. Deixou claro que segue estando “enferma” en innumerables sectores, como o xudicial e mesmo mediático.

O acto serviu para a presentación oficial do proxecto agora.gal, un agregador e distribuidor de contidos dixitais en galego. Unha nova proposta de comunicación en galego que fundirá nunha única plataforma unha manchea de xornais e revistas do país, que estará en breve na rede dentro de moi pouco.

Pechou a serie de intervencións Pablo Garcia Chichas, xornalista de Radio Estrada e representante da AMEGA, que xa apuntou que a entidade xa é socia protectora na Casa de Rosalía. “O xornalismo en galego é cada vez máis necesario, medios veraces, plurais… que exercemos de servizo público gracias á nosa versión bidireccional da nosa comunicación”, expresou. “Quen conta a cantidade de empresas que se marchan fóra de Galicia? Os medios en galego! Agora estamos en Madrid todo o día, pero que pasa cos traballadores de Alcoa, que pasa co Consorcio, que pasa coa deputación de Ourense?”, preguntouse Pablo, focalizando na “utilidade” da nosa lingua para contar o que pasa no país.

O programa foi emitido por streaming (ou “polo rego”, como propón Fede en clave de normalizar as novas tecnoloxías na nosa lingua) a través das canles de AMEGA (Youtube: https://youtu.be/7pEgX7kkeZc; @mediosengalego en Facebook e @AMEGAOficial en Twitch),  e ademais será retransmitido o domingo ás 21:30 en NósTv (no 119 de R) e o luns ás 18:00h nas radios municipais galegas da rede Radiofusión.

A cita foi unha festa para os máis de 140 medios que a día de hoxe comunicamos na nosa lingua activos este marzo 2021.

O evento, no que colaborou a Secretaria Xeral de Política Lingüística da Xunta de Galicia e o Departamento de Normalización da Deputación da Coruña, estaba formulado para emitir o 7 de febreiro (a data oficial aprobada por unanimidade no Parlamento Galego, en memoria da publicación do primeiro medio de comunicación en galego, O Tío Marcos d’A Portela en 1876) que se adiou ata onte polas restricións sanitarias.