Os traballadores denuncian que a política de contratación que utiliza o Goberno autonómico para contratar os medios aéreos de loita contra incendios non é a axeitada, “posto que tivo operativas bases aéreas durante meses de choiva e agora no mes de xuño, cando son realmente necesarias, estas permanecen pechadas”. Pídenlle á Consellería que corrixa esta situación de maneira urxente.

Para os sindicatos, a acción da Xunta corrobora a “improvisación en materia de incendios forestais tendo en conta as actuais condicións metereolóxicas de vento desecante do Nordés e altas temperaturas”. Acusan ao Executivo galego de “mala xestión” no que respecta á “organización dos medios propios cos que conta para apagar os lumes”.