“Grandes das viñetas”, elixidos por outro grande. A obra de quince mestres de todo o mundo, “de Rusia ata Esteiro”, poderase apreciar no centro museístico de Fene. Escolleunos Xaquín Marín, que levaba tempo dándolle voltas á idea. “A iniciativa foi del e o nome tamén”, explica a responsable do Museo do Humor. O bautizo foi doado, “viña cantado, os mellores están no Olimpo”, defende Xaquín.

O italiano Alessandro Gatto, Ángel Boligán, de Cuba, ou Antonio Moreira de Portugal, son algúns dos seleccionados, entre os que tamén figura o galego Siro. “Foi moi difícil a escolla”, recoñece Marín que agradece a colaboración de todos os artistas, “colaboraron como un solo home, iso fala do prestixio que ten o Museo no mundo”. A responsable do centro cultural tamén atribúe a boa resposta ao “cariño que lle teñen a Xaquín” e destacou “a xenerosidade e a vontade de colaboración inmediata” dos creadores.