“Unha das mellores viaxes da miña vida”, asegura Ana Rodríguez, que estivo en Kenia recentemente. O gran reclamo de Kenia é a natureza. “Alí vas para ver paisaxes e animais, grandes e pequenos”. Iso si hai que estar disposto a facer moitos quilómetros en todo terreo por carreiros de terra, cedo e ao atardecer para evitar o calor, e a visión dos animais non está garantida porque un safari non é ver un documental na televisión. 

Non é unha viaxe barata nin idónea para familias con nenos. “Pero paga moito a pena, xenial para facer unha vez na vida polo menos”. Para viaxar a Kenia recoméndase poñer antes algunhas vacinas. Débese levar mochila e maleta branda. Imprescindible meter nela roupa e calzado cómodos, gorra e gafas de sol, protección solar e antimosquitos.