As diferentes intervencións tiveron lugar pola tarde, e comezaron polas mesas redondas nas que se debateron a nova lexislación, así como as posibles consecuencias que se poden derivar desta nova base. Así, no primeiro relatorio, o presidente do Instituto Universitario de Xeoloxía Isidro Parga Pondal, Vidal Romani, resaltou que “non se lle ve utilidade social ao proxecto”, e incidiu nas consecuencias que a extracción de cuarzo poderían atinxir, das que destacou a posibilidade de grandes inundacións debido ás características do chan da zona.

Pola súa banda, Margarida Prieto Ledo, actual coordinadora comarcal do Sindicato Labrego Galego (SLG), fixo un percorrido por estes tres anos de loita veciñais, nos que se presentaron un bo número de recursos, alegacións, xuntanzas, mobilizacións e demais actos reivindicativos por parte de asociacións e veciños chairegos.

A través do asesor xurídico do SLG, José Pérez Rei se puideron coñecer os contenciosos interpostos pola multinacional Erimsa contra os concellos de Castro, Cospeito e A Pastoriza, arestora en curso. Pérez Rei recalcou que se trata dunha actividade autorizable, máis non "permitida", malia o cambio lexislativo.

Outras das accións desta xornada foron as diferentes lecturas por parte de persoas do eido da cultura, entre as que destacaron as intervencións de Xabier Cordal,  Darío Xohán Cabana e Alfonso Torrado.    O manifesto de apoio á loita contra as minas na Terra Chá, realizado por Docampo, foi finalmente lido por Xabier Cordal; xa que Docampo non puido acudir por coincidir cunha homenaxe á súa persoa.

O serán e a noite foron o espazo para a música, xa que tivo lugar un concerto nos que se subiron ao escenario muimentino  os grupos Ruxe-Ruxe, Zenzar, García Dj (de Dios ke te crew), De Perfil e Banda Potemkin.