Lucía Toval, Nuria Silván, Ainhoa López, Lucía Varela e Bruno Rivero son estudantes dos últimos cursos do grao en Enxeñaría de Deseño Industrial e Desenvolvemento do Produto na Escola Universitaria de Deseño Industrial. Os cinco implicáronse no proxecto que lidera a profesora Ana Ares. 

“Parecíanos unha obriga facela accesible a todas as persoas, ocorréusenos a idea de involucrar ao alumnado, contactamos con entidades que traballan con persoas con dis-capacidade e estamos a desenvolver o proxecto”, indica a profesora Ana Ares.

“Entender como adaptar calquera deseño a estas persoas”, aprendeu Lucía Toval con este traballo. “É algo moi importante para a nosa carreira, dedicámonos a deseñar e o deseño ten que chegar a todo tipo de usuarios”, explica.

Clases inclusivas

A profesora Ana Ares, que tamén é vicerreitora do Campus de Ferrol e Responsabilidade Social, destacou que na USC hai dous programas para achegar formación universitaria a persoas con necesidades especiais. Calquera estudante que pase as probas da EBAU recibe axuda da Unidade de Atención á Diversidade para obter as adaptacións necesarias para cursar as asignaturas co resto dos compañeiros. “Tamén temos un programa do que estamos moi orgullosos, que depende da miña Vicerreitoría, que é Espazo Compartido para persoas con dis-capacidade cognitiva que non serían quen de pasar a EBAU pero teñen a inquietude de recibir formación universitaria, son clases inclusivas e impártese na Escola de Camiños na Coruña”, sinalou Ana Ares.