A exposición “Aves Ártabras” é unha escolma da exposición itinerante “Aves de Galiza” do Centro de Extensión Universitaria e Divulgación Ambiental de Galiza (CEIDA), na que se poden coñecer moitas das aves que, malia pasar desapercibidas, acompañan o noso día a día nos parques, praias, esteiros, cantís ou fragas da contorna. O pasado martes 6 de setembro, tivo lugar o relatorio “As aves mariñas do Golfo Ártabro, veciñas do mar e do ceo”, a cargo de Serxio París, coordinador do programa de Educación Ambiental e Espazos Naturais Protexidos do CEIDA. O Centro de Interpretación do Medio Mariño (CIMM) de Cabanas é un proxecto impulsado pola área de medio ambiente do Concello de Cabanas, e conta con financiamento de fondos FEMP a través do GALP Golfo Ártabro Norte. Pode visitarse de 9 a 15 horas de martes a xoves, e de once a dúas e de tres a seis de venres a domingo. "Aves de Galiza" estará exposta no CIMM ata o vindeiro 11 de setembro.

Na imaxe, Iago Varela (Tenente de Alcalde de Cabanas) e Serxio París (coordinador do programa de Educación Ambiental e Espazos Naturais Protexidos do CEIDA) durante o relatorio de aves mariñas no CIMM.