"Para os de aquí o estaleiro é case toda a nosa historia", subliña. Nos antecedentes hai que resaltar o nome de Ramón Aguilar Prieto, que en 1917 regresa a Perlío de Uruguai e monta na ribeira un obradoiro de carpinteiría para reparación e construción de embarcacións de madeira. Outro nome, o de José María González Llanos que en 1940  funda Astano. O primeiro barco foi o “Comandante Lobo”, pesqueiro de madeira propulsado a vapor. En 1958 xa constrúe petroleiros e cargueiros. A actividade no estaleiro beneficiouse da guerra dos Seis días, porque o peche do canal de Suez levou a construír máis barcos con maior capacidade. Un ano despois, no 1968, instalouse o guindastre pórtico, tan representativo. Baixo del cabería a catedral de Santiago, contounos Estefanía. E sería quen de levantar 800 turismos a un tempo. Outro dos grandes fitos na historia do estaleiro foi, en 1972, a botadura do Arteaga que tanta expectación levantara. A calidade da construción no estaleiro mesmo quedou en evidencia co desastre do Discoverer Enterprise, o 13 de xaneiro de 1998. Rompeu a ponte das Pías pero este buque de prospección petrolífera non sufriu dano ningún. “Ese buque alí aparcado na ponte, cando foi retirado na ponte non tivo ningún dano”.