Do balance feito pola Concellería de Turismo destaca, ademais do importante incremento de turistas con respecto ao ano anterior, a procedencia dos visitantes que nunha ampla maioría proveñen de diversas rexións do territorio español e nunha menor cuantía de países do estranxeiro. De feito e tal e como se pode comprobar nos datos aportados por Mary Sánchez, persoa encargada de atender a oficina durante estes dous meses, das 4175 persoas que pasaron pola oficina, 3995 procedían dalgunha rexión do noso país e só 180 chegaron a Arzúa dende algún país do estranxeiro. No pasado ano o punto de información turístico de Arzúa foi visitado por 3.027 persoas, delas case un 50% eran españois e o outro 50% turistas estranxeiros. As cifras polo tanto indican que se incrementou notablemente o número de visitas, pero éstas son efectuadas por visitantes nacionais nun 90%. Estes datos representan un síntoma claro de que o Camiño de Santiago se ten convertido nunha alternativa de ocio para un amplo número de turistas que aproveitan as súas vacacións para peregrinar a Compostela, axudados por unha forma de viaxar máis económica e tendo en conta que nos atopamos ás portas do Ano Santo.

Segundo os datos ofrecidos pola Concelleira de Turismo, Marisol Ríos, e a persoa responsable da oficina, Mary Sánchez, a gran maioría de viaxeiros que pasa por Arzúa son peregrinos que veñen facendo o Camiño de Santiago, vén sexa por motivos relixiosos ou por facer turismo, principalmente. O 70% peregrinan polo Camiño Francés e un 10% polo Camiño do Norte. O outro tipo de visitas que recibe a nosa vila é de xente que está de paso ou aloxada en turismo rural da zona que quere coñecer o entorno e Galicia; a porcentaxe destes visitantes sería dun 10% con respecto á cifra global. O 10% restante correspondelle a emigrantes que teñen familia aquí e que proceden na súa maioría do País Vasco ou Cataluña. A maioría das cuestións efectuadas polos visitantes foron relativas ao Camiño Francés, se ben tamén foron moitos os que se interesaron por coñecer zonas que visitar en Arzúa e nos arredores ou por dar con establecementos nos que poder aloxarse.

Por comunidades, foi Madrid quen aportou o maior número de visitas, cun total de 507, seguida de Cataluña, con 451. Tamén é de salientar o número de consultas efectuadas polos andaluces cun total de 330 ou dos valencianos, 345. Prácticamente, segundo indicou a concelleira Marisol Ríos, "podemos indicar que tivemos visitantes de todas as comunidades autónomas, chama a atención por exemplo o caso das Illas Canarias con máis de 50 persoas que se achegaron ata a oficina o que nos indica claramente que Arzúa é un lugar turístico por excelencia, con productos e recursos de calidade que ofrecer a quen nos visita". Con respecto aos datos de visitantes procedentes do estranxeiro seguen salientando, igual que ocurría o pasado ano, as visitas de turistas procedentes de Italia, Francia, Alemaña e Holanda.