Nenos e nenas estrearán material escolar e reencontraranse con compañeiros e profesores. Algúns, ademais, comezan este mércores a súa vida académica. Este curso, no CEIP Centieiras acudirán a clase ao redor de 145 escolares, 18 deles, con 3 aniños, van ao cole por primeira vez, segundo nos dixo a directora do centro educativo. A maioría entran con 3 anos e continúan todas as etapas educativas no colexio, ata cumprir os 12. Da súa formación ocúpanse 15 mestres e mestras entre persoal propio e itinerante. 

Un centro familiar

“Somos un centro moi familiar, intentamos potenciar a cohesión e o vínculo de comunidade educativa”, explicou Andrea Fernández. O primeiro día de clase é unha xornada especial para nenos e nenas, para as súas familias e tamén para o profesorado e os equipos directivos dos centros escolares que levan dedicado moito tempo para que os colexios estean listos para o comezo do curso, preparando programacións, horarios e ata colocando mobles nas aulas. Tamén en Radio Fene agardamos con ansia a primeira visita dos redactores e locutores das “Crónicas de Centieiras”.