Ventos do Bacallau e Pysbe. Unha exposición sobre a factoria de bacallau ábrese este venres na sala da Autoridade Portuaria.. O groso da exposición saíu do Arquivo da Autoridade Portuaria, do Museo Naval de Ferrol e de cidadáns particulares.  A vindeira semana haberá actos nunha carpa instalada no peirao de Curuxeiras. Haberá tamén cociña e degustación de bacallau nas inmediacións do porto. O venres 24 as sete da tarde haberá unha mesa redonda coa participación dos historiadores Guillermo Llorca e Henrique Sanfiz, o biólogo Xoam Luis Ferreiro “Cesio” e do músico e escritor Xurxo Souto. O sábado 25 o chef do Camiño do Inglés Dani López ofrecerá varios pratos cociñados con bacallau. Ese mesmo dia haberá unha cata maridaxe con viños galegos e petiscos de alta cociña. Na exposición amosarase un receitario con receitas de bacallau, publicado pola Pysbe en 1936 , segundo Francisco Barea, da Autoridade Portuaria de Ferrol San Cibrao. 
O sábado 25 tocará nas inmediacións do porto Manolo Bacallau e o domingo 26 vanse cociñar en directo cabeza de bacallau en caldeirada e lombos estilo Pysbe. A idea xa estaba na mente de moita xente da zona desde hai anos. A PYSBE estaba moi presente na vida do barrio, segundo explicou o presidente da Asociación Veciñal de Ferrol vello Manuel Zapata quen explicou esta mañá os seus recordos de neno da fábrica. "Alí aprendín a andar en bicicleta" sinalou. 
 A PYSBE pechou as súas portas en 1973. Protagonizou anos antes un dos conflitos laborais máis singulares da ditadura. O 13 de abril de 1967 formouse en Ferrol unha manifestación de máis de mil cincocentas persoas contra os despidos na empresa bacallaeira. A policía franquista dispersou a protesta e provocou oito feridos. Pero as traballadoras lograron a retirada dos despidos. A factoria tivo moita importancia para a vida económica e social da comarca. O nome das xornadas alude aos barcos bacallaeiros da Pysbe que tiveron nome de ventos. A PYSBE influíu na economía e na sociedade de Ferrol en xeral e de Ferrol vello en particular, segundo explicou un dos promotores do evento Emilio Romero
Pasaia
Pesquerias y Secaderos de Bacalao de España creouse en 1919 en Pasaxes (Guipúscoa) para comercializar o bacallau, un peixe que distribuído en seco (salgado) conservábase comestible e chegaba a toda a península. Consumíase en grandes cantidades tamén en localidades do interior a onde as deficientes comunicacións impedían que chegase outro tipo de peixe.
A comisión organizadora pide a colaboración da hostalaría de Ferrol coa preparación de pratos e tapas do bacallau a vindeira semana. Sortearán cen euros para gastar nos negocios do barrio. A memoria da Pysbe e do bacallau volve a Ferrol. A exposición inaugurase este venres na Autoridade Portuaria. Para a próxima semana xornadas do bacallau na zona do porto.