Na Galipedia todo o mundo pode colaborar sen importar o seu nivel académico, hai tarefas axeitadas para cada un, e pouco a pouco todo se pode aprender, afirman os editores. Ademais hai tamén formas de colaborar que non implican editar artigos. Unha forma moi importante de axudar ó proxecto é subir fotografías con licenza libre dos lugares da nosa terra, as aldeas, os ríos, os castros, os petróglifos, as praias, etc, son todos sitios especiais que se teñen unha foto no seu artigo aumentan de forma doada a súa calidade. Dende o proxecto, animan á xente a que participe na creación da enciclopedia de todos, e se non saben por onde comezar, que pidan axuda na Taberna que sempre hai alguén para botar unha man aos debutantes.