As actividades organizadas pola Asociación Cultural Arraianos comezarán ás doce da mañá no mosteiro de Celanova, que durante os anos da guerra foi cárcere franquista. Alí colocouse un mural, inaugurado hai 3 anos, en homenaxe aos represaliados do franquismo, obra de Xosé Vizoso. Neste contexto poderase asistir a un recital poético a cargo de Xosé Luis Méndez Ferrín, Baldo Ramos e poetas das Redes Escarlata de Vigo.

A continuación os actos trasladaranse ata a Poza das Rás, onde hai 73 anos, o 29 de agosto de 1936, foron asasinados Xulio González Alvárez, de 25 anos, mestre en Gontán e natural de Verea; Amadeo López Bello, de 32 anos e mestre e colaborador da revista Nós, natural de Carballeda de Avia; e Silvio Torres Díaz, de 23 anos, condutor, nado en Ourense. Alí terá lugar unha nova lectura poética e unha ofrenda floral en recoñecemento a estes tres homes. A mañá completarase cun xantar popular nun restaurante de Celanova.

Lembrando a Celso Emilio

Ás seis e media da tarde os festexos trasladaranse ao cemiterio de San Breixo, onde repousan os restos mortais de Celso Emilio Ferreiro. Un novo recital poético e musical terá lugar alí e nel participarán, ademais dos mencionados, Manuel Vilanova, Anxo Angueira, Víctor Campio ou Moncho Nicolás. Este último pasa por ser un dos grandes especialistas existentes na figura do poeta celanovés. A cargo del está a recollida dun epistolario ou a escolma dos artigos publicados en prensa por Celso Emilio. Co gallo de contar con Moncho Nicolás realizarase un diálogo ficticio entre el e o poeta falecido hai 30 anos. Ademais terá lugar a lectura dramatizada dos artigos de Celso Emilio Ferreiro referidos a Celanova.