A conselleira de Sanidade, Rocío Mosquera, afirmou no Parlamento de Galicia, que non se pode "incumprir a lei" estatal relativa ao novo copagamento nos fármacos de dispensa hospitalaria, ao tempo que sinalou que a "achega" que deben facer os pacientes crónicos é "do 10 por cento" do custo da súa medicación.  Na súa comparecencia ante a Cámara a petición propia, a conselleira escoitou as críticas, especialmente de PSdeG e BNG, sobre este novo "repagamento" e replicou que "non é este o Gobierno que puxo en marcha esta medida".  Con todo, ante a petición da deputada do Bloque Montse Prado de que "non se aplique en Galicia" este copagamento toda vez que "xa hai comunidades gobernadas" polo PP que xa manifestaron a súa intención de non a aplicar", Mosquera rexeitou "incumprir a lei". "¡Non son aspirinas nin medicinas para unha pequena dor, senón para enfermidades graves, como cancro ou hepatite C!", exclamou a nacionalista, quen considerou que esta opción "indigna, inhumana e inxusta retrata" o Goberno que a aproba. Porén, na súa réplica Mosquera fixo fincapé en que a competencia sobre a prestación sanitaria "non está transferida" a Galicia e en que foi o ministerio do ramo o que decidiu introducir este tipo de medicamentos na categoría "de achega reducida".