A Xunta de Galicia aumenta a subvención aos colexios privados

A Xunta de Galicia aumenta a subvención aos colexios privados

17 de Agosto, 2015 - 12:00 h. | Publicada por Radio Eume

A Xunta ven de ampliar o número de unidades concertadas cos colexios privados da comunidade. As modificacións afectan a Educación Primaria e máis ao 2º curso da FP básica. Aumentan un total de vintecinco unidades nos diferentes niveis  educativos. Entre eles figura un colexio que segrega por sexo.

A Consellaría de Educación publica no DOG desta xornada unha orde pola que se modifican os concertos educativos con centros privados. Unha modificación que, denuncia CIG-Ensino, segue a incrementar, “un ano máis”, o número de unidades concertadas con centros privados, incrementando así os fondos públicos para financiar empresas privadas “mentres a Xunta continúa recortando profesorado e negándose a cubrir as demandas feitas polos centros”.

A Consellaría recorre de novo ao mes de agosto, prosegue a central sindical nun comunicado, para facer públicas as modificacións dos concertos cos centros privados, “co obxecto de que pasen desapercibidos ao conxunto da sociedade. E fai isto despois de dar instrucións á inspección educativa para que se continúe recortando profesorado nos centros públicos, fixando uns cadros de persoal para o vindeiro curso en que se pode constatar como a Consellaría, non só non atende as solicitudes dos centros educativos, senón que pretende recortar o xa insuficiente número de docentes”.

Fronte a esta situación na pública, a Consellaría, di a CIG, incrementa o número de unidades concertadas, ampliando os concertos ao 2º curso de FP Básica e mesmo incrementando o número de unidades que xa se incrementaran en anos anteriores. “Sucede así en Educación Primaria, pois a orde publicada hoxe recolle un incremento neto de 5 unidades concertadas máis ca no curso que remata este mes de agosto”. Algo que tamén acontece en FP. En FP Básica incrementan os concertos ao 2º curso, polo que serán 19 unidades concertadas máis ca este curso. Increméntanse tamén as unidades concertadas de FP en dúas unidades, unha delas nun dos centros que discrimina o alumnado por xénero.

Sociedade