“Case acabaríamos antes falando dos problemas que non hai”, destaca o profesor Fernando Fesnillo. Sinala que no edificio C ten unhas fendas notables que se ven desde fóra, ademais “os alfeizares eran de madeira e xa non hai, están apodrecidos, caeu auga enriba dunhas tomas de correntes, duns enchufes, no inverno había que poñer dous deshumidificadores, un radiador e un split, para ter unha temperatura soportable durante as clases”, relata. 

Tamén a ANPA sinala as grandes deficiencias que ten o edificio e pide a intervención dunha vez da administración educativa. “Dende a dirección do centro esgotaron todos os pasos, o Concello tamén se moveu e a resposta desde a Consellería nada”, explica Iria García. Por iso teñen en marcha unha campaña de recollida de sinaturas. Agradecen a gran colaboración por parte dos establecementos comerciais de Fene e animan á veciñanza a participar nunha concentración este mércores, ás 16 horas, diante da Delegación da Xunta en Ferrol onde presentarán as sinaturas recollidas.