“Queda moito camiño que andar”, destaca a alcaldesa. “Todas as mulleres temos o dereito a ser libres, non temos dono, mandamos nos nosos corpos, ninguén ten dereito a gobernar as nosas vidas”. O Concello de Fene dedicará dous días á conmemoración. A programación, prevista para o martes 25 e o mércores 26, combina arte comunitaria, reflexión e compromiso colectivo. 

Mil flores lilas confeccionadas por un grupo de veciñas de Fene  protagonizan a instalación artística que se vai inaugurar o día 25 na Casa do Concello. A alcaldesa agradeceulles ás mulleres do gancho “este acto de amabilidade e compromiso con este Concello”.

Os actos continuarán o mércores 26, coa proxección, na Casa da Cultura, do filme “Prefiro Condenarme”, coa presenza da súa directora, Margarita Ledo. “Un filme que recomendo é unha historia conmovedora, a de Sagrario, unha muller adiantada ao seu tempo, que sufriu todo tipo de violencia, moitas mulleres poden verse reflectidas nesta loitadora”, sinala Sandra Permui.