A posta en escena é simple e innovadora. As letras que conforman o título do espectáculo van construíndo palabras que nomean os espazos, obxectos e sentimentos que acompañaron a Lois e as súas relacións e amizades, personaxes que se materializan baixo a forma das iniciais dos seus nomes.

Benxamín Otero encárgase do son e toca en directo a música, que axuda a crear os ambientes necesarios e a ilustrar algúns dos espazos que recorreu Lois (o hospital, a praia de Barrañán, o bar Parrús no Orzán, a súa casa...). Esta banda sonora mestura composicións propias con fragmentos de pezas queridas e escoitadas por Lois de Pata Negra, Zeca Afonso, Satie, Mahler, Bach, entre outros.

Poesía Última de LP estreouse o pasado venres no Barriga Verde de Lalín. Este xoves, 12 de maio, presentarase na Biblioteca González Garcés da Coruña, o 17 no Verbum de Vigo, o 19 na Biblioteca de Pontevedra e o 21 en Carballo.