En 1989, preto de cen mulleres, catro delas en folga de fame, pecháronse na fábrica de conservas Odosa, na Illa de Arousa, como protesta ao peche inminente da factoría. Mentres durou o encerro, gravaron un documental para contar, en primeira persoa, que estaba a suceder. Do descubrimento e restauración desta cinta, partiu un novo proxecto audiovisual. Con ese material como base, Uqui Permui decidiu narrar a historia das traballadoras contada polas mesmas protagonistas, mesturando pasado co presente. As voces recollidas no documental denuncian que o traballo das mulleres sempre se considerou un complemento ao dos seus compañeiros e non un salario en si mesmo, aínda que moitas vivan elas e os seus fillos unicamente deses ingresos.

Doli, doli, doli... coas conserveiras. Rexistro de traballo proxéctase o xoves na Facultade de Socioloxía da Coruña. Tamén se poderá ver no Museo Marco, o día 28 de abril, e no CGAI, o 21 de maio, e pasará, a principios de xuño, polo Festival de Films de Dones de Barcelona.