Representando a Moeche acudirán a alcaldesa Beatriz Bascoy e a concelleira e deputada provincial Cristina García a unha feira declarada de interese turístico galego. En Lourenzá haberá estes días degustacións, actuacións musicais, concentración de vehículos clásicos e un tren turístico, pero, sobre todo, comercio coas súas famosas fabas, que están amparadas pola Indicación Xeográfica Protexida e son motor da economía local. Sete produtores terán postos na praza do Conde Santo. E o domingo, ás oito e media da mañá, será a apertura da venda ao por maior. Este ano os prezos subiron porque a produción foi menor debido á seca. Festa da Faba. Boa ocasión para visitar Lourenzá e coñecer, de paso, o seu monumental mosteiro de San Salvador, declarado Conxunto Histórico-Artístico en 1974. A súa fachada considérase o antecedente da fachada do Obradoiro da catedral de Santiago de Compostela.