Carballos, bidueiras, cerdeiras, castiñeiros, pradairo, tamén algún acivro e freixo. Árbores autóctonas que plantarán unha vintena de persoas “nunha parcela dun socio que estaba a toxo, encima da fraga do Belelle, vai quedar moi ben”. Van repoboar con frondosas o terreo de case unha hectárea con árbores autóctonas, parte delas doadas polo proxecto europeo Life Terra, que “as controlará durante todo o seu crecemento”. Varias décadas son necesarias para que cheguen a lucir en todo o seu esplendor. “As árbores autóctonas requiren paciencia, ata 30-40 anos non empezarán a xuntarse as copas e dar sombra”. “Os buratos xa os temos feitos, atopamos bastante pedra, igual hai que repasar algo”. Comezarán a faena ás dez da mañá e teñen previsto rematar contra a unha e media. Cando acaben a xornada de traballo teñen previsto repoñer forzas nun xantar.