E non lle falta razón: de súpeto a adolescencia planetaria devece polos homes coa cara chea de pote e no maior termómetro mundial do sex-appeal, o forro das carpetas de instituto, aparece mil veces multiplicada a faciana do polimorfo cantante de Tokio Hotel e a palidez de cirio pascual de Robert Pattison, o protagonista do filme “Crepúsculo”, que se estrea en televisión en Antena 3.

A inminente estrea da segunda parte nas salas de proxección pasa por ser o acontecemento cinematográfico do ano e as escenas de histeria colectiva arredor do protagonista corpóreo das novelas vampíricas de Stephanie Meyer abofé que o confirma. Antes os vampiros eran seres afectados e cun punto de altivez propia dun antigo réxime que os afastaban das preferencias comúns: agora son emos, mais emos namorados. A historia de amor do vampiro bo cunha humana é máis grande que a morte e tira do lacrimal como non acontecía dende o último capítulo de “Abigaíl”. El, coa súa branca palidez, como cantaban os Procol Harum, debátese no nin contigo nin sen ti teñen os meus males remedio. E entre allo e crucifixos discorre “Crepúsculo”, que debuta ás dez e cuarto da noite.