Pasarán polo plato-circo de tres pistas de Pablo Motos e o seu equipo os gañadores dos premios Goya á mellor actriz de reparto, Marta Etura, e actor revelación, Alberto Ammán, bos intérpretes e ademais ben parecidos. Claro que coa xeira de elementos catódicos que levamos, a un parecíalle máis acaído que rescatasen ao inxustamente esquecidos nos premios da película e gran robaplanos galego Luís Zahera, maxestuoso na súa composición do tradicional yonqui coruñés. Gorra do Mundial 82, camiseta de tirantes, e pantalón de chandal por enriba do embigo, o problema da drogha e ese dominio da idiosincrasia lingüística herculina farían que Bea a lexionaria e John Cobra fuxisen escorrentados en canto lles berrase o primeiro “Oísteessss!”. Pero hai que recoñecer que os outros dan mellor na pantalla. Comprobarémolo en Cuatro ás dez menos dez.