No programa aniversario os convidados, protagonistas aparentemente descoñecidos entre si, convivirán durante as horas previas ao programa sen saber que os unen lazos familiares moi importantes. A resolución, ao cabo duns minutos e coas cámaras ben pegadas ás glándulas lacrimais, xa sabemos como será: un espectáculo de choros que estourarán como unha orxía pirotécnica para xerar unha onda de empatía en boa parte da audiencia e un severo malestar de estómago noutra entre a que me inclúo. Impertérrita, accionando o detonador das miserias en público estará Sandra Daviú, a condutora de “El Diario” dende que Patricia, se cadra co depósito da vergoña allea cheo, abandonara o programa hai agora un ano. Mais como se dunha película de “Star Wars” se tratase, Patricia, o Emperador, volve hoxe ao trono para examinar como a súa moza padawan -Davíu no papel de Anakin Skywalker- o está a facer no seu proceso de conversión a Darth Vader, ama e señora do lado escuro da televisión.

Testemuños impúdicos tratados como números de circo para solitarios de sofá. Triste estampa a de “Estás Invitado”, o melodrama en tempo real que emite esta noite Antena 3 a partir das dez.