Esta especie está a espallarse pola A-6 e este carácter invasor podería chegar a afectar a ecosistemas de grande valor ecolóxico, mesmo aos que pertencen a zonas de Rede Natura 2000, como o río Neira, a lagoa de Río Caldo, en Begonte, o encoro de Cecebre ou os espazos intermareais de Betanzos.

Así, ambos os dous colectivos dirixíronse aos servizos da Xunta de Galicia (Medio Ambiente e Medio Rural), así como ao Ministerio de Fomento, para que retiren da Autovía A-6, ao seu paso polas provincias de Lugo e A Coruña, esta especie. A herba da Pampa tróuxose a Galicia como planta ornamental e demostrou que se pode reproducir a 30 quilómetros de distancia desde onde estea situada.

A reclama presentada por ADEGA e PAEXGA ante os organismos competentes consta dun informe no que se indica cal é a situación das plantas, as consecuencias da súa expansión, propostas para executar a súa retirada, e información lexislativa na que se contempla como delito ecolóxico a introdución de especies foráneas.