Coa transformación, a Xunta pretende que o IGAPE cambie a súa filosofía de ente subvencionador a axencia para dar servizos as empresas. Unha mudanza que, en troques de funcionar “no sentido positivo”, estaría a empregarse para “escapar dos controis”, segundo denunciou en Radiofusiòn o voceiro de CIG-Autonómica Xosé Ramón Vázquez. As novas axencias véndense como unha forma de reducir a administración paralela da Xunta, os chamados “chiringuitos”, mais estaríanse a usar para mudar os modelos de xestión. Favorécense as subrogacións e os contratos de asistencias técnicas para acometer o seu traballo en troques de empregar os propios medios públicos. Esas axencias “non terán os mesmos controis que a Administración nin en tema de persoal nin en cartos”, alerta a central nacionalista.

A CIG vén de presentar as alegacións previas á constitución da Axencia de Promoción Económica, pero só pode facelo en materia de persoal, onde denuncia que se vai favorecer a contratación e asimilación de traballadores contratados sen os procesos selectivos pertinentes, evitando a supervisión da Dirección Xeral de Función Pública. Xosé Ramón Vázquez.

Os plans do Goberno teñen difícil rectificación. O sindicalista recoñece que “a Xunta ten a tixola polo mango”. “Non negocia porque si, senón porque está obrigada, e ademais non é obrigatorio que nos faga caso”, explica Vázquez, apuntando que hai “máis axencias que negociacións”.

No caso concreto do IGAPE, a súa reformulación non impedirá que manteña unha estrutura polémica: dos 133 empregados, 45 son cargos directivos ou de libre designación: “Unha pirámide invertida”, resolve o voceiro da CIG.