Estes traballos realizaranse de maneira continua ao longo do tempo de vixencia deste convenio –que rematará o 31 de decembro de 2011- e coincidirán coa temporada de verán, cando se incrementa notablemente o número de peregrinos cara a Santiago de Compostela. Para estes efectos, a S.A. Xestión do Plan Xacobeo outorga ao Concello de Ferrol unha contía de 2.734,8 euros, que irá destinada á conservación da ruta Xacobea. A este respecto, tal e como se recolle no convenio de colaboración, o Concello de Ferrol adoptará todas as medidas oportunas que eviten o seu deterioro ou destrución respectando en todo momento as medidas de protección que lle sexan indicadas desde a S.A. de Xestión do Plan Xacobeo e desde a Dirección Xeral do Patrimonio Cultural, axustándose ao contemplado na Lei de Patrimonio Cultural de Galicia e a Lei de Protección dos Camiños de Santiago. Estas medidas executaranse non só sobre a franxa do terreo que constitúe o Camiño en sentido estrito senón tamén sobre as zonas laterais de protección. Así mesmo, as obrigas asumidas polo Concello de Ferrol serán realizadas tendo en conta a importancia histórica das rutas de peregrinación.  

Vicente Irisarri, destacou a importancia deste convenio de colaboración que contribuirá a manter nun bo estado de conservación o Camiño Inglés ao seu paso polo concello de Ferrol, onde ten orixe esta ruta (concretamente no Peirao de Curuxeiras). Neste senso, o rexedor municipal manifestou a intención do Concello de Ferrol de continuar apoiando esta ruta xacobea e devolverlle o esplendor que tiña polo ano 1300, cando se empezaron a ter as primeiras novas deste Camiño, e máis tarde, polo 1600, cando se ten constancia do primeiro hotel de peregrinos na cidade.  

Se ben o Camiño Inglés non é a ruta máis empregada na actualidade por quen deciden peregrinar a Compostela, ten un importante valor histórico e cultural, que se pretende conservar e promover. Este representa diversos beneficios para a actividade turística, comercial, hoteleira e hostaleira da cidade, sen esquecer o seu valor espiritual e seu simbolismo, que é a base que sustenta o Camiño.