"Cómpre chamar ás cousas polo seu nome, democracia á democracia real e cleptocracia, ou por usar unha palabra máis sinxela, roubo, a eses organismos internacionais que desgobernan o mundo" apuntou contundente a autora da "Teoría do caos". "A lingua galega é irrenunciable" manifestou Manuel Lorenzo quen reiterou o seu convite aos "soños" nestes "tempos de banqueiros e contables".

A crítica continuou na voz de Marcos Calveiro -Premio Merlín- quen lle adicou palabras "de escarnio", aos que nos "mal gobernan" e se propoñen recortar servizos básicos como a educación, a sanidade ou a atención aos maiores e dependentes. Calveiro realizou unha afervoada, intensa e sentida defensa da escola pública e do maxisterio, que recolleu unha prolongada ovación entre as xentes da cultura que enchían o auditorio do antigo campo de concentración do franquismo.