O PP recupera a Alcaldía de Sada, mentres que perde a de Betanzos na área metropolitana da Coruña, logo de recibir o apoio, na constitución das novas corporacións municipais, do Partido Demócrata Sada Popular (PDSP), do seu ex militante Ramón Rodríguez Ares, no primeiro caso e perder, no segundo, o apoio de Cidadáns por Betanzos (CxB).

Ademais de en Betanzos, na área metropolitana da Coruña os socialistas gobernarán en Culleredo e en Bergondo con pactos, mentres que a Alcaldía coruñesa pasa, por primeira vez na época democrática, ao PP, que obtivo maioría absoluta o pasado 22 de maio, tras 28 anos de gobernos encabezados polos socialistas.

Nunha asemblea previa ao pleno, os militantes de CxB decidiron apoiar a candidatura socialista á Alcaldía encabezada por José Ramón García. O acordo deixou sen opcións á actual rexedora en funcións, María Faraldo, a pesar de ser a lista máis votada. O BNG tamén apoiou ao candidato socialista.

En Sada, finalmente, e tras días de incerteza, gobernará o PP de Ernesto Anido despois de que o Partido Democráta Sada Popular (PDSP) de Ramón Rodríguez Ares, con 5 concelleiros, un máis que os populares, apoiase a súa candidatura. Logo de numerosas reunións, agora queda a situación pendente dun posible pacto de goberno.