O rexedor ferrolán destacou que a cidade ferrolá “ademais de naval e militar, é universitaria” . Neste sentido Rey Varela insistiu en que se trata dunha universidade “marcada pola súa xuventude e que se está a facer un oco entre os campus galegos e españois grazas ao seu“potencial científico e cultural”. Ademais sinalou que “temos un Campus Universitario cunha oferta formativa ampla e variada que nos últimos anos forneceu a moitas das mellores empresas do país”. Engadindo que nel está boa parte do noso futuro”.

O alcalde considera fundamentais estas xornadas nas que se citan os mellores profesionais do pensamento metodolóxico nacional e internacional. “Os avances da tecnoloxía e da ciencia provocaron importantes transformacións sociais nos comezos do século XXI”, dixo. “Estes cambios”; dixo, “transforman a sociedade e supoñen alteración no plano dos valores e da ética que debemos estudar para coñecer en primeira persoa os retos da sociedade moderna na que vivimos”, concluíu.

As XVIII Xornadas de Filosofía e Metodoloxía Actual da Ciencia están coordinadadas polo profesor, Wenceslao J. González, do departamento da Humanidades da Universidade da Coruña. Entre os relatores invitados a este encontro, destaca William Shea, catedrático na Universidade de Padua, onde ocupa a "Cátedra Galileo". É un dos principais expertos do mundo na figura e o labor científico de Galileo Galilei e autor dun prestixioso libro, que segue a ser unha referencia 30 anos despois da súa publicación: “A revolución intelectual de Galileo”.