A Carreira de Disfraces, que se celebrará por primeira vez este ano, terá como punto de saída a Praza de Armas, ás 11.30 horas, e discurrirá polas principais rúas do centro da cidade. Poderán participar nenos e maiores. Os participantes co mellor disfraz e o máis divertido recibirán como premio unha fin de semana de turismo rural. Ademais os tres primeiros clasificados por categoría recibirán unha metopa o e produtos típicos do Entroido e o grupo máis divertido será recompensado cunha cesta repleta de produtos típicos destas datas de Entroido. 

O I Concurso de Doces Tradicionais de Entroido, dirixido a particulares e establecementos da cidade, terá lugar este domingo. O xurado valorará o disfraz dos participantes, a presentación do doce de Entroido e o seu sabor. O gañador, recibirá tamén unha fin de semana de turismo rural. 

O III Concurso de Tapas de Entroido celebrarase os vindeiros luns e martes nos establecementos hostaleiros para escoller a mellor tapa típica do Entroido, en horario de 11.00 a 15.00, e finalizará o Martes de Entroido.  

Os interesados en participar nas dúas primeiras citas teñen de prazo ata mañá. No Concurso de Tapas, a inscrición pódese formalizar ata pasadomañá sábado. Deberán presentar a súa solicitude no Rexistro Xeral, situado na Casa do Concello, ou a través do correo electrónico a festas@ferrol.es, ata o sábado. 

Por outra banda, a edil María López anunciou que serán finalmente 15 as agrupacións que participarán no Festival de Comparsas que terá lugar na praza de España o Martes de Entroido. Irá precedido dun desfile que ás 19.30 horas terá como punto de partida a praza de Amboaxe. O percorrido festeiro rematará na Praza de España, onde comezarán as actuacións das comparsas participantes. Os seus integrantes interpretarán os seus repertorios de burlas e chirigotas (dous temas por formación e en lingua galega), Rematado o festival, tanto as comparsas como as máscaras percorrerán, ata a medianoite, as rúas ferrolás.