Unha voz moi particular pasou por Radiofusiòn. Non só pola súa calidade, senón tamén pola súa orixe: Bretaña. En bretón, francés ou inglés exprésase a música de Gwennyn. Gran revelación da vizosa escena musical bretoa co seu primeiro álbum, que lle valeu o premio á mellor artista nova do país, en maio deste ano publicou o seu segundo traballo, “Mammen” ou  “Matriz” en galego. Trátase dunha modernización do folk bretón pasado pola peneira do rock e o pop.

Gwennyn amosa interese polo folk galego e, malia que xa coñecía ben a Carlos Núñez e Susana Seivane, durante a súa primeira visita a Galicia aproveitou para descubrir tamén a discografía de Berrogüetto e Guadi Galego, entre outros. Atenta á amistosa rivalidade entre os festivais de Lorient e Ortigueira, a intéprete bretoa devece por ter a oportunidade de pisar as táboas do gran concerto galego agora que xa foi quen de debutar no evento bretón.