En Barallobre o grupo dos Seráns Activos está formado por doce persoas, todas mulleres. A máis nova é Isabel Rodríguez Fernández, que leva uns meses xubilada. A maior, súa nai, Carmen, que ten 90 anos. Isabel empezou traballar con 14 anos nunha fábrica de punto en Ferrol, onde todas eran mulleres. A mediados dos anos 70 todas quedaron no paro e Isabel tivo moitas outras ocupacións ata chegar á xubilación. Ademais de formar unha familia, criar dous fillos, implicarse na asociación veciñal e tamén na Anpa. Hoxe, viúva, vive soa co seu canciño. Pasou vinte anos sufrindo migrañas e con depresión. Na súa vida laboral atopou desigualdade. Ela pensa que houbo avances para as mulleres na incorporación á vida laboral, pero queda camiño por andar.